आनी छ्योइङ डोल्माको नियुक्ति विवादबारे
आनी छ्योइङ डोल्मालाई रास्वपा सरकारले लुम्बिनी विकास कोषको उपाध्यक्षमा नियुक्त गरेपछि उनिमाथिको अवैध सम्पत्ति, सम्पत्ति शुद्धीकरण कसुर, नक्कली नागरिकता र तिब्बती नागरिक भएको जस्ता विषयमा तीव्र आलोचना भइरहेको बेला कलाकार राजा राजेन्द्रले लेखेका छन्— “आनी दिदी! कि भन्नुस्, ‘मैले लेखेको आत्मकथा गलत हो। मैले मान्छेहरूलाई इमोशनल ब्ल्याकमेलिङ गर्नको लागि म तिब्बती शरणार्थी परिवारमा जन्मिएकी हुँ भनेर लेखेकी थिएँ। त्यो गलत थियो। विकिपीडियामा भएको मेरो जीवनीमा पनि मलाई तिब्बती आनी भनिएको छ, त्यो पनि गलत हो।'”
“होइन भने तपाईंले वंशजको आधारमा लिनु भएको नेपाली नागरिकता गलत छ। (व्यक्तित्वको हिसाबले तपाईं मानार्थ नागरिकता पाउन योग्य हुनुहुन्छ। तर वंशजको नागरिकता?)”
“हेर्नुस् त, राजनीति कति घिनलाग्दो हुँदो रहेछ। ‘मेरो पैतालाले किरा नमारोस’ भन्ने त्यस्तो सद् विचार भएको मान्छे— तपाईंलाई अलिकति आलोचना गर्नेहरूलाई ‘मासु-भातमा बिकेर आलोचना गरेको’ भन्नसम्म भ्याउनु भयो। जातीय र धार्मिक द्वन्द्व हुन्छ भनेर धम्क्याउन भ्याउनु भयो। जुन एक आनीको लागि कति सुहाउँदो कुरा होला?”
“कति गलत ठाउँमा पुग्नु भएछ, विचार गर्नुहोस् त। यो नियुक्ति तपाईं नै अस्वीकार गर्नुहोस्। दसैँ भर्खरै सकियो, तर मासु-भात खाएर लेखेको नभन्दिनु होला।”
