Pramod Timalsina
बारा–३ मा प्राविधिक नेतृत्वको उदय
इन्जिनियर प्रज्वल (प्रमोद) तिमिल्सिनाको उम्मेदवारीले बढायो राजनीतिक चासो
बारा । २०८२ फागुन २१ गते हुने प्रतिनिधिसभा निर्वाचनलाई लक्षित गर्दै बारा क्षेत्र नं. ३ मा प्राविधिक पृष्ठभूमिका उम्मेदवारको उपस्थितिले राजनीतिक सरगर्मी बढाएको छ। राष्ट्रिय स्वतन्त्र पार्टी (रास्वपा) बाट इन्जिनियर प्रज्वल (प्रमोद) कुमार तिमिल्सिना संघीय संसदको प्रतिस्पर्धामा उत्रिने तयारीमा रहेका छन्।
कलैया उपमहानगरपालिका–७, बैरियाका स्थायी बासिन्दा तिमिल्सिनाको उम्मेदवारी औपचारिक रूपमा घोषणा भइनसके पनि स्थानीयस्तरमा उनको व्यक्तित्व, व्यावसायिक प्रतिष्ठा र सामाजिक स्वीकार्यताले जित सुनिश्चित हुने दाबी हुन थालेको छ। बरेवा निवासी बसन्त नेपालका अनुसार वंश वा पैसाभन्दा काम र क्षमताले परिचित व्यक्तिको रूपमा तिमिल्सिनाप्रति जनसमर्थन बढ्दो क्रममा छ।
उनको सामाजिक सञ्जाल, विशेषगरी फेसबुकमा देखिएको स्थानीयवासीको सकारात्मक प्रतिक्रिया र समर्थनले यस दाबीलाई थप बल पुर्याएको देखिन्छ। यद्यपि, अन्तिम नतिजा भने निर्वाचन सम्पन्न भएपछि मात्रै स्पष्ट हुने राजनीतिक विश्लेषकहरूको भनाइ छ।
इन्जिनियर तिमिल्सिनाले अमेरिकी दूतावास, बुटवल पावर कम्पनी तथा जिटिजेड (GIZ) परियोजनाहरूमा २५ वर्षभन्दा बढी प्राविधिक अनुभव हासिल गरेका छन्। वरिष्ठ प्राविधिकका रूपमा काम गरेका उनी उर्जा, जलविद्युत र पूर्वाधार विकासका क्षेत्रमा दक्ष विज्ञका रूपमा परिचित छन्।
बारा–३ का लागि तिमिल्सिनाले प्रस्तुत गरेका योजनाहरू स्थानीय आवश्यकता र दीर्घकालीन विकाससँग जोडिएका छन्। उनका प्रमुख योजनाहरू निम्नानुसार छन्—
- कृषि–उर्जा: सौर्य सिँचाइ र कोल्ड स्टोरेज पाइलट परियोजनामार्फत किसानको आम्दानी दोब्बर बनाउने।
- युवा रोजगार: ‘युवा प्राविधिक प्रशिक्षण केन्द्र’ स्थापना गरी विद्युत, सोलार र एचभ्याक प्रविधिमा दक्ष जनशक्ति उत्पादन।
- स्मार्ट नगर: कलैयालाई नमूना स्मार्ट सहर बनाउँदै पानी, मल, जलविद्युत र डिजिटल सेवाको व्यवस्थित व्यवस्थापन।
- शिक्षा गुणस्तर: स्थानीय विद्यालयहरूमा प्राविधिक ल्याब र आधुनिक शैक्षिक सामग्रीको व्यवस्था।
इन्जिनियर तिमिल्सिना आफूलाई वंश, धन वा पहुँचले होइन, काम र सेवाले चिनिने जनप्रतिनिधि बन्ने प्रतिबद्धता व्यक्त गर्छन्। स्थानीय विकास, पारदर्शी नेतृत्व र तथ्यमा आधारित नीति निर्माण नै आफ्नो राजनीतिक आधार हुने उनको दाबी छ।
प्राविधिक अनुभव, स्पष्ट योजना र बढ्दो जनसमर्थनका कारण बारा–३ मा तिमिल्सिनाको सम्भावित उम्मेदवारीलाई यस निर्वाचनको एक महत्वपूर्ण र चासोको विषयका रूपमा हेरिएको छ।
