नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’की स्वकीय सचिव गंगा दाहालले आफू र आफ्नो परिवारविरुद्ध नियोजित रूपमा आर्थिक अनियमितता र पद दुरुपयोगको भ्रामक प्रचार भइरहेको भन्दै त्यसको कडा शब्दमा खण्डन गर्नुभएको छ।
सामाजिक सञ्जालमार्फत एक वक्तव्य जारी गर्दै उहाँले जुनसुकै निकायबाट हुने कानुनी छानबिनका लागि आफू र आफ्नो परिवार तयार रहेको स्पष्ट पार्नुभएको छ।
नेपालको राजनीतिक तथा सामाजिक रूपान्तरण, नागरिक अधिकारको पुनर्बहाली र गणतन्त्र स्थापनाका लागि भएका बलिदानको इतिहास जोड्दै दाहालले विगतदेखि नै क्रान्ति र आन्दोलनसँग जोडिएका नेतृत्व तथा तिनका परिवारलाई लक्षित गरी अनर्गल प्रचार गर्ने काम भइरहेको उल्लेख गर्नुभएको छ। पुराना सामन्ती अवशेष र राजनीतिक प्रतिशोध साध्न खोज्ने तत्त्वहरूले सर्वसाधारणमा भ्रम फैलाउन यस्ता आधारहीन आरोप लगाएको उहाँको ठम्याइ छ।
“समाज परिवर्तनको क्रान्तिमा होमिएको हाम्रो बाल्यकाल असामान्य ढङ्गले बित्यो। भोलिको बिहानीको आशासमेत नगरी अनेकौँ रातहरू बिताएका हामीले आज सुन्नै नसकिने आरोप सार्वजनिक रूपमै सुन्नुपर्दा दुःख लागेको छ र गम्भीर ध्यानाकर्षण पनि भएको छ।”
विगतमा आफूहरूमाथि दुबईमा ४० अर्ब रुपैयाँ रहेको, भाटभटेलीलगायतका ठूला व्यापारिक संस्था र घरजग्गामा लगानी रहेको भन्दै अफवाह फैलाइएको तर ती आरोपहरू कुनै तथ्य र प्रमाणबाट पुष्टि हुन नसकेको उहाँले बताउनुभयो।
“कुनै पनि आरोप पुष्टि नभएपछि बजारमा अहिले ४० अर्बको ठाउँमा ५० करोडको हावादारी हल्ला चलाउन खोजिएको रहेछ। म सार्वजनिक रूपमा चुनौती दिन चाहन्छु, अफवाह फैलाउनेहरूले यसको पुष्टि गर्न सक्छन्? हेक्का रहोस्, सत्य अन्ततः सत्य नै हुन्छ।”
उहाँले राज्यका कानुनी निकायले गर्ने जुनसुकै छानबिनमा सहयोग गर्न आफूहरू तयार रहेको र दोषी ठहरिए कारबाही भोग्न पनि तयार रहेको स्पष्ट पार्नुभयो। सम्पत्ति विवरण सरकारसमक्ष पहिले नै बुझाइसकेको उल्लेख गर्दै उहाँले बिनाकारण र बिनाप्रमाण लगाइने आरोप स्वीकार्य नहुने बताउनुभयो।
एक छोरीका नाताले र क्रान्तिको निरन्तरताका रूपमा आफ्ना बुवालाई सहयोग गर्नु अपराध हो र? भन्दै उहाँले समाजका अगुवा र आम नागरिकसमक्ष प्रश्नसमेत गर्नुभएको छ।
“हामी मृत्युको मुखबाट बाँचेर आएका हौँ। हामीलाई के गर्न हुन्छ, के गर्न हुँदैन राम्रोसँग थाहा छ। हामी मृत्युवरण गर्छौँ तर जनतालाई धोका दिन सक्दैनौँ, यही नै हाम्रो स्कुलिङ हो। आफ्नो व्यक्तिगत जीवनसमेत नभनी मैले छोरीको नाताले बुवालाई सहयोग गर्नु नै अपराध हो त?”
दाहालले जनयुद्ध र जनआन्दोलनको जगमा बनेको संविधान तथा कानुनी शासनप्रति आफ्नो पूर्ण निष्ठा रहेको दोहोर्याउँदै सम्पूर्ण न्यायप्रेमी नागरिकहरूलाई यस्ता प्रायोजित र भ्रामक प्रचारको भ्रममा नपर्न हार्दिक अनुरोध गर्नुभएको छ।
