विधिको शासन र कानुनी प्रक्रियाबारे धारणा
“जरुरी पक्राउ पुर्जी” कुनै राजनीतिक हतियार होइन, यो विधिको शासनको एक संवेदनशील उपकरण हो। जब अपराधको आशंका गम्भीर हुन्छ, प्रमाण नष्ट हुने, अभियुक्त फरार हुने वा अनुसन्धानमा अवरोध पुग्ने तथा दलबल देखाएर अवरोध गर्न खोज्ने सम्भावना देखिन्छ, त्यस्तो अवस्थामा राज्यले ढिलाइ सहन सक्दैन। त्यसैले जरुरी पक्राउ पुर्जीको व्यवस्था गरिएको हो।
नेपालको कानुनले मात्र होइन, विश्वका प्रायः सबै विधि प्रणालीहरूले यस्तै आपतकालीन अधिकारलाई मान्यता दिएका छन्। विधि भनेको व्यक्ति हेरेर चल्ने होइन, परिस्थिति र प्रमाण हेरेर चल्ने हो। केपी शर्मा ओली वा रमेश लेखक हुन् वा साधारण नागरिक, कानुनको दृष्टिमा सबै बराबर हुन् भन्ने सिद्धान्त यहीँ परीक्षण हुन्छ।
जरुरी पक्राउ पुर्जीको आवश्यकता व्यक्तिविशेषका लागि होइन, न्याय प्रक्रियालाई प्रभावकारी बनाउनका लागि हो। यसलाई राजनीतिक चश्माबाट हेर्ने होइन, विधिको शासन (Rule of Law) को आधारभूत अंगको रूपमा बुझ्नुपर्छ।
