शुभकामनाको १५ घण्टा नबित्दै पूर्व प्रम ओली र लेखक पक्राउ, बालेन क्याबिनेटको पहिलो निर्णयले सडक तातियो

काठमाडौं, चैत १४ — नवनियुक्त प्रधानमन्त्री बालेन्द्र शाहलाई सामाजिक सञ्जालमार्फत शुभकामना दिएको १५ घण्टा नबित्दै पूर्व प्रधानमन्त्री केपी शर्मा ओली पक्राउ परेका छन्। फागुन २१ को निर्वाचनपछि विकसित नयाँ राजनीतिक शक्ति सन्तुलनका बीच चैत १३ गते राष्ट्रपतिबाट नियुक्त भई हिजो मात्र शपथ ग्रहण गरेका बालेन शाहको १५ सदस्यीय क्याबिनेटले पदभार सम्हालेलगत्तै ऐतिहासिक ‘एक्सन’ लिएको हो।

नवनियुक्त गृहमन्त्री सुधन गुरुङको कमाण्डमा आज बिहानै एमाले अध्यक्ष ओली र कांग्रेस नेता तथा तत्कालीन गृहमन्त्री रमेश लेखकलाई पक्राउ गरिएको छ। जेन-जी आन्दोलन दबाउन भूमिका खेलेको आरोपमा गौरी बहादुर कार्की आयोगको सिफारिस कार्यान्वयन गर्न भन्दै गरिएको यो पक्राउको विरोधमा यतिबेला काठमाडौंका सडकमा एमाले कार्यकर्ताहरू व्यापक प्रदर्शनमा उत्रिएका छन्।

हर्क साम्पाङको कडा मत: “भाटै भाटा लगाउनुपर्छ”

यस घटनाक्रममा धरानका मेयर हर्क साम्पाङले भने कडा र फरक धारणा सार्वजनिक गरेका छन्। उनले भनेका छन्— “सिंह दरबार, संसद भवन, सर्वोच्च अदालत र कयौँ सरकारी भवन जलाउने भत्काउने कृत्यको अगुवाहरूलाई पनि गिरफ्तार गरेर भाटै भाटा लगाउनु पर्छ!” साम्पाङको यो टिप्पणीले राजनीतिक प्रतिशोध भन्दा पनि विधिको शासन र भौतिक संरचनाको सुरक्षामा जोड दिएको देखिन्छ।

फणिन्द्र नेपालको आशा: “ग्रेटर नेपालका लागि हर्कबढाइँ”

ग्रेटर नेपालका अभियान्ता फणिन्द्र नेपालले बालेनको उदयलाई राष्ट्रिय स्वाधिनताको नयाँ युगको रूपमा व्याख्या गरेका छन्। उनले बालेन प्रधानमन्त्री बन्नुलाई ग्रेटर नेपालको मुद्दालाई अन्तर्राष्ट्रिय मञ्चमा पुर्‍याउने सुनौलो अवसरको रूपमा लिएका छन्।

अहिले देशभरको माहोल एकातिर बालेन सरकारको ‘क्लिन अप’ अपरेसनको समर्थन र अर्कोतिर पक्राउको विरोधमा विभाजित भएको छ। राजधानीको सुरक्षा व्यवस्था अत्यन्तै कडा पारिएको छ र सडकमा सुरक्षाकर्मीहरूको बाक्लो उपस्थिति रहेको छ।