तत्कालीन प्रधानमन्त्री र गृहमन्त्री मात्र होइन, सुरक्षा निकायका नेतृत्वलाई पनि पक्राउ गर्न ‘जेनजी’ को माग

काठमाडौं — जेन्जी आन्दोलनका क्रममा भएको दमनप्रति लक्षित गर्दै जेनजी मुभमेन्ट नेपालले तत्कालीन प्रधानमन्त्री र गृहमन्त्री मात्र नभई आन्दोलन दमनमा प्रत्यक्ष संलग्न सुरक्षा निकायका जिम्मेवार व्यक्तिहरूलाई समेत तत्काल पक्राउ गरी कारबाही प्रक्रिया अगाडि बढाउन सरकारसँग माग गरेको छ।

बालेन्द्र शाह नेतृत्वको सरकारले आज बिहानै पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकलाई पक्राउ गरेपछि विकसित घटनाक्रममा संगठनले आफ्नो आधिकारिक धारणा सार्वजनिक गरेको हो। संगठनले जारी गरेको प्रेस विज्ञप्तिमा आन्दोलन दमनमा प्रत्यक्ष भूमिका खेलेका सम्पूर्ण पक्षमाथि निष्पक्ष छानबिन हुनुपर्ने उल्लेख गर्दै कुनै पनि दोषीलाई उन्मुक्ति दिन नहुने स्पष्ट पारेको छ।

यसैबीच, देशमा शान्ति सुव्यवस्था कायम गर्दै अराजकताको अन्त्य गर्न सरकार संवेदनशील र जिम्मेवार बन्नुपर्नेमा संगठनले जोड दिएको छ। नागरिकहरूको सुरक्षा, अधिकारको प्रत्याभूति तथा विधिको शासन कायम गर्नु राज्यको प्रमुख दायित्व भएको पनि संगठनले सरकारलाई स्मरण गराएको छ।

नवनियुक्त गृहमन्त्री सुधन गुरुङले पदभार ग्रहण गरेलगत्तै ‘गौरी बहादुर कार्की आयोग’ को प्रतिवेदन कार्यान्वयनमा तदारुकता देखाएपछि यसले सुरक्षा संयन्त्रभित्र पनि हलचल पैदा गरेको छ। जेन्जी आन्दोलनसँग सम्बन्धित घटनाको निष्पक्ष छानबिन र दोषीमाथि कारबाहीको माग पछिल्लो समय थप सशक्त बन्दै गएको छ, जसले गर्दा आगामी दिनमा थप सुरक्षा अधिकारीहरू अनुसन्धानको घेरामा पर्ने सम्भावना बढेको छ।

एकातिर सडकमा पक्राउको विरोध भइरहेको छ भने अर्कोतिर पीडित युवाहरूको समूहले ‘पूर्ण न्याय’ को माग गर्दै दबाब बढाइरहेका छन्। बालेन शाह नेतृत्वको १५ सदस्यीय क्याबिनेटको यो पहिलो ‘अग्निपरीक्षा’ का रूपमा हेरिएको छ।