‘प्रचण्डले हल नगरेको टिआरसी, अब रवि–बालेनको काँधमा’

‘जनताको सप्ट बिद्रोहलाई आत्मसाथ गर्दै राष्ट्रघात विरुद्ध खबरदारी गर्नुपर्छ’

२०८२ चैत ५ गते बिहिबार | काठमाडौं

जनयुद्धकालीन मुद्दाहरूलाई सत्य निरूपण तथा मेलमिलाप आयोग (टिआरसी) मार्फत हल गर्न प्रचण्डसहितका पुराना दलहरू चुकेको र त्यसको जिम्मेवारी अब रवि–बालेनको काँधमा आएको वक्ताहरूले बताएका छन्। बिहीबार राजधानीको संवाद डबलीमा अखिल नेपाल जनसांस्कृतिक महासंघले आयोजना गरेको कार्यक्रममा वक्ताहरूले रास्वपा नेतृत्वको सरकारका राम्रा कार्यमा साथ दिने प्रतिबद्धता व्यक्त गरेका छन्।

वरिष्ठ अधिवक्ता एकराज भण्डारीले विस्तृत शान्ति सम्झौतालाई तार्किक निष्कर्षमा पुर्‍याउनुको सट्टा पुराना दलहरू सत्ता र शक्तिको खेलमै समय बिताएको आरोप लगाएका छन्। भण्डारीले जनयुद्धको मुख्य नेतृत्व माओवादी र प्रचण्ड नै गैरजिम्मेवार बन्दा आजको अवस्था आएको जिकिर गरे। उनले चेतावनी दिँदै भने, “रास्वपा नेतृत्वले टिआरसीलाई गम्भीरताका साथ लिनुपर्नेछ र त्यसको जिम्मेवारी रवि र बालेनजीहरूको काँधमा आएको छ।”

“हामी सबैले रास्वपालाई दिएको जनमतको सम्मान गर्नुपर्छ, देश र जनताको हितमा गर्ने हरेक कदमहरूमा साथ पनि दिनुपर्छ, तर उसले पुरानै दलहरूले जस्तै राष्ट्रघात गर्न थाले चुप बस्न हुन्न,” भण्डारीले थपे।

नेकपा (माओवादी) का पोलिटब्युरो सदस्य माइला लामाले जेनजी विद्रोहपछि भएको निर्वाचनमा जनताले प्रस्टसँग परिवर्तनको म्याण्डेट दिएको र त्यसलाई नयाँ सरकारले पूरा गर्ने विश्वास व्यक्त गरे। लामाले जनयुद्धको रगत र बलिदानमार्फत नै देशमा परिवर्तन आएको बताउँदै नयाँ क्रान्तिकारीहरूसँग सहकार्य गर्न तयार रहेको बताए।

सो कार्यक्रममा शोभा दुलाल, मुक्तान थोवा, डम्बर थामी, गिलु रातोस, सीता तुम्खेवा लगायतका कविहरूले कविता वाचन गरेका थिए भने कलाकार आरोह नेपाली र रमन थामीले गीत प्रस्तुत गरेका थिए। उनीहरूले कला र साहित्यमार्फत गणतान्त्रिक योद्धाहरूको भावनालाई सम्मान गर्दै नयाँ सत्तालाई खबरदारी गरेका छन्।