गरिब र पैदलयात्रीमाथि धानाढ्यको दादागिरी : बीच सडकमा कुटपिट गर्ने जिप चालक पक्राउ
काठमाडौं — समाजमा गरिब, निमुखा, सिमान्तकृत र भुईँमान्छेमाथि सामन्ती सोच र धानाढ्य अहंकार कसरी व्यवहारमा प्रकट हुन्छ भन्ने अर्को ज्वलन्त उदाहरण काठमाडौंमै देखिएको छ।
बीच सडकमा हिँडिरहेका एक पैदलयात्रीमाथि कारबाट ओर्लिएर कुटपिट तथा दुर्व्यवहार गर्ने जिप चालकलाई प्रहरीले पक्राउ गरेको छ। घटना काठमाडौंको व्यस्त क्षेत्र नारायणगोपाल चोकस्थित सडक खण्डमा भएको हो।
प्रहरीका अनुसार बा ३ च ११०३ नम्बरको निजी जिप चालकले सार्वजनिक स्थलमै पैदलयात्रीलाई हातपात गरेको भिडियो सामाजिक सञ्जालमा भाइरल भएपछि अनुसन्धान अगाडि बढाइएको थियो। उक्त भिडियोका आधारमा प्रहरीले मंगलबार नै आरोपीलाई नियन्त्रणमा लिएको हो।
पक्राउ पर्ने व्यक्ति बैतडी पुर्ख्यौली घर भई हाल काठमाडौंको बालुवाटार बस्ने ४२ वर्षीय पारस बम रहेको प्रहरीले जनाएको छ। बमलाई काठमाडौं उपत्यका ट्राफिक प्रहरी कार्यालयमार्फत नियन्त्रणमा लिई थप अनुसन्धानका लागि काठमाडौं जिल्ला प्रहरी परिसरमा बुझाइएको छ।
प्रहरीका अनुसार गाडी रोकिएको अवस्थामा एक पैदलयात्री बीच सडक हुँदै हिँडिरहेका बेला बम कारबाट झरेर उनीमाथि कुटपिटमा उत्रिएका थिए। सार्वजनिक स्थलमै भएको उक्त अमानवीय व्यवहारले सामाजिक सञ्जालमा व्यापक आक्रोश पैदा गरेको थियो।
घटनासम्बन्धी थप अनुसन्धान जारी रहेको र कानुनी प्रक्रिया अगाडि बढाइएको प्रहरीले जानकारी दिएको छ।
यो घटना केवल एक व्यक्ति र एक पैदलयात्रीबीचको विवाद मात्र नभई, शक्तिशाली र साधारण नागरिकबीचको असमान सोच, वर्गीय अहंकार र सार्वजनिक सुरक्षाप्रतिको गम्भीर प्रश्नको रूपमा पनि हेरिएको छ।
