बालेन सरकारले किन खोल्दैन यी तीन ओपन सेक्रेट फाइल?
‘फाइल खोल्छु’ को नारा दिएर चर्चित रवि लामिछानेको दल राष्ट्रिय स्वतन्त्र पार्टीबाट झन्डै दुई तिहाइ जनमतसहित प्रधानमन्त्री बनेका बालेन्द्र शाहले अझै पनि सहजै खोल्न सकिने तीन ठूला अपराधका फाइलमा ध्यान नदिएको देखिएको छ। यी फाइलहरू गृह मन्त्रालय र प्रहरीमार्फत तत्काल अनुसन्धान अघि बढाउन सकिन्छ। कुनै संवैधानिक अड्चन छैन, प्रक्रिया मिच्नु पनि पर्दैन। तर राजनीतिक दबाब र नेक्सस् तोड्ने हिम्मत देखाइएको छैन।
१. केपी ओलीका स्वकीय सचिव राजेश बज्राचार्यको ‘घुसको घर’
दरबारमार्गको नेपाल ट्रस्ट जग्गा भाडामा दिने अपराध अनुसन्धान गर्दा केन्द्रीय अनुसन्धान ब्यूरो (सीआईबी) ले फेला पारेको तथ्य : ओलीका प्रमुख स्वकीय सचिव राजेश बज्राचार्यको श्रीमतीको नाममा यती समूहको तारा एयरको घर ९६ लाखमा पास भएको छ। आर्थिक कारोबारको कुनै प्रमाण छैन। यो घर जग्गा अनियमित भाडा निर्णयको ‘घुस’ भएको आशंका सीआईबीको अनुसन्धानले देखाएको छ।
२. नक्कली भुटानी शरणार्थी काण्ड
नेपाली नागरिकलाई भुटानी शरणार्थी बनाएर बेच्ने यो लज्जास्पद संगठित अपराधमा गृहमन्त्री, सचिव र शक्तिशाली सल्लाहकारहरू संलग्न थिए। बालकृष्ण खाँण, टोपबहादुर रायमाझी, टेकनारायण पाण्डे जस्ता नेता थुनामा छन्। तर आरजु राणा, मञ्जु खाँण, रामबहादुर थापा बादल र ओलीका स्वकीय राजेश बज्राचार्यको नाम जोडिए पनि पूरक अनुसन्धान भएन। मनी ट्रेल र कल रेकर्डका आधारमा थप अनुसन्धान गर्न सकिने प्रमाण छन्। गृह मन्त्रालयले चाहेमा यो फाइल तत्काल खोल्न सकिन्छ।
३. सुन तस्करीको राजनीतिक कनेक्सन
२०७४ को ३३ किलो सुन तस्करी र ६१ किलो भेप-ब्रेकशू सुन तस्करीका अनुसन्धान प्रतिवेदन सरकारले अझै सार्वजनिक गरेको छैन। इश्वराज पौडेल समितिको ७७२ पृष्ठको प्रतिवेदनमा २९२ जनाको नाम किटान छ। चिनियाँ नागरिक दाओजिन वाङसँग पूर्व सभामुख कृष्णबहादुर महरा र उपराष्ट्रपति नन्दकिशोर पुन पासाङ परिवारको सम्पर्क देखिएको छ। गृह मन्त्रालयले पुराना प्रतिवेदन अध्ययन गरी अनुसन्धान अघि बढाउन सक्छ।
निष्कर्ष : यी तीन फाइल ‘ओपन सेक्रेट’ छन्। बालेन सरकारले कार्यकारी शक्तिको प्रयोग गरेर तत्काल खोल्न सक्छ। राजनीति-अपराधको नेक्सस् तोड्न र जनताको विश्वास जित्न यति सहज अवसर अर्को कहिले आउँछ?
