रोल्पा पहिरोप्रति रास्वपाद्वारा दुःख व्यक्त: प्रभावकारी खोजी र राहतको माग
काठमाडौँ। अविरल वर्षाका कारण रोल्पाको थवाङ गाउँपालिका–५, कोतलाबाङमा बुधबार राति गएको भीषण पहिरोमा परी ७ जनाको निधन र ५ जना बेपत्ता भएको घटनाप्रति राष्ट्रिय स्वतन्त्र पार्टी (रास्वपा) ले गहिरो दुःख व्यक्त गरेको छ। पार्टीले विपद्मा परी अकालमा ज्यान गुमाउनेहरूप्रति श्रद्धाञ्जली अर्पण गर्दै शोकाकुल परिवारमा समवेदना व्यक्त गरेको छ साथै बेपत्ताहरूको प्रभावकारी खोजी र घाइतेहरूको शीघ्र स्वास्थ्य लाभको कामना गरेको छ।
रास्वपाका महामन्त्री विपिन कुमार आचार्यद्वारा जारी विज्ञप्तिमा पछिल्लो २४ घण्टामा रोल्पा लगायत देशका विभिन्न भागमा बाढी र पहिरोले ठूलो क्षति पुर्याएको भन्दै चिन्ता व्यक्त गरिएको छ। यस्तो कठिन परिस्थितिमा पनि सीमित स्रोतसाधनका बाबजुद उद्धारमा खटिएका सुरक्षाकर्मी र स्थानीय नागरिकको प्रयास सह्रानीय रहेको विज्ञप्तिमा उल्लेख छ।
विपद् आइसकेपछि मात्रै तात्ने र पूर्वतयारीमा सधैं चुक्ने परम्परागत तथा फितलो कार्यशैलीकै कारण आम नागरिकले बर्सेनी ज्यान गुमाउनु परिरहेको भन्दै रास्वपाले सरकारको ध्यानाकर्षण गराएको छ। पार्टीले तीनै तहका सरकार (संघ, प्रदेश र स्थानीय) लाई विपद्को पूर्वसूचना प्रणाली प्रभावकारी बनाउन, जोखिमयुक्त बस्तीहरूको पहिचान गरी सुरक्षित स्थानान्तरण गर्न र प्रभावित क्षेत्रमा तत्काल उद्धार, राहत र निःशुल्क उपचारको व्यवस्था मिलाउन आग्रह गरेको छ।
निरन्तरको वर्षाले देशभरको जनजीवन, सडक सञ्जाल र बस्तीहरू जोखिमपूर्ण बनेकाले सम्भावित विपद्बाट जोगिन उच्च सतर्कता अपनाउन, अत्यावश्यक कामबाहेक यात्रा नगर्न र नदी किनार तथा पहिरोको जोखिम रहेका क्षेत्रमा विशेष सावधानी अपनाउन रास्वपाले आम नागरिकमा अपिल समेत गरेको छ। साथै, पार्टी संयन्त्रलाई पनि देशभर विपद् पूर्वको तयारी र विपद् पछाडिको कार्यमा राज्यका संयन्त्रहरूलाई सघाउन चौबीसै घण्टा तयार रहन निर्देशन दिइएको छ।
