नयाँ पुस्ताका स्रोतामाझ चम्किँदै गायक आयुष मगर: रुकुमदेखि अमेरिकासम्मको लोभलाग्दो यात्रा
नेपालको विकट जिल्ला रुकुमको माटोमा जन्मिएर सङ्गीतिक यात्रामा होमिएका आयुष मगर आजको युवा पुस्तामाझ अत्यधिक लोकप्रिय छन्। पछिल्लो समय मेलोडी र आधुनिक रोमान्टिक शैलीका गीत पस्किएर उनले स्रोतामाझ आफ्नो बलियो पहिचान बनाएका छन्। गीत लेखन, गायन र सङ्गीत संयोजनमा आफ्नै मौलिक शैली बोकेका आयुष छोटो समयमै नेपाली सङ्गीत आकाशको एउटा आशालाग्दो नाम बन्न सफल भएका हुन्।
रुकुमबाट सुरु भएको उनको सङ्गीतिक यात्रा अहिले सात समुद्रपारि अमेरिकासम्म फैलिएको छ। भूगोलको हिसाबले उनी नेपालभन्दा टाढा रहे पनि䀘 उनको सङ्गीत भने रैथाने माटो र नेपाली भावनासँगै प्रगाढ रूपमा जोडिएको छ। प्रवासको अनुभव, मातृभूमिको सम्झना, प्रेम र दूरीका आयामहरूलाई उनले आफ्ना गीतमा दुरुस्तै उतार्ने गरेका छन्। यही आधुनिकता र नेपालीपनको सुन्दर फ्युजनका कारण नयाँ पुस्ताका स्रोतालेका सिर्जनाहरूलाई निकै रुचाएका हुन्।
डिजिटल प्लेटफर्ममा आयुषको लोकप्रियताको ग्राफ निकै माथि छ। उनका ‘माया पनि बसेकै थियो’ र ‘लैजाने छु तिमीलाई’ जस्ता गीतहरूले युट्युबमा ११ लाखभन्दा बढी र पछिल्लो हिट गीत ‘कान्छी’ ले २४ लाखभन्दा बढी भ्युज बटुल्दै बलियो हाइप सिर्जना गरेका छन्।
आयुषलाई समकालीन अन्य गायकभन्दा फरक देखाउने मुख्य कडी म्युजिक भिडियो निर्माणप्रतिको उनको सिनेमाटिक सोच हो। उनी गीत गाउने मात्र होइन, त्यसलाई एउटा जीवन्त ‘भिजुअल स्टोरी’ (दृश्य कथा) का रूपमा पर्दामा उतार्छन्, जसले गीतको मर्मलाई झनै गहिरो बनाइदिन्छ।
बलियो डिजिटल उपस्थिति र प्रवासमा रहेका नेपाली स्रोतामाझ बढ्दो क्रेजले आयुष मगर नयाँ पुस्तालाई प्रतिनिधित्व गर्ने एक कुशल कलाकार हुन् भन्ने प्रमाणित गर्छ। आफ्नो मिहिनेत र लगावमार्फत नेपाली सङ्गीतलाई अन्तर्राष्ट्रिय बजारसम्म पुर्याउन सकिन्छ भन्ने कुरालाई उनले उदाहरणीय रूपमा देखाइरहेका छन्।
