पत्रकार गणेश पाण्डेको घरमा योजनाबद्ध तोडफोड : सामाजिक सञ्जाल उत्तेजनाबाट प्रेरित आक्रमण, ८२ वर्षीया हजुरआमाको कोठामा बढी क्षति
`
`काठमाडौं, १४ कात्तिक २०८२ । प्रेस चौतारी नेपालका केन्द्रीय अध्यक्ष तथा पत्रकार गणेश पाण्डेको लमजुङस्थित घरमा मध्यराति अज्ञात समूहले ढुङ्गा प्रहार गरी तोडफोड गरेको घटनालाई योजनाबद्ध आक्रमणको रूपमा लिइएको छ । घटनाले पत्रकारहरूलाई त्रसित बनाउने र अभिव्यक्ति स्वतन्त्रता दबाउने प्रयास गरेको ठहर गर्दै प्रेस चौतारी नेपाल र नेपाल पत्रकार महासंघले निन्दा गरेका छन् ।
`
`बेसीशहर नगरपालिका–८ मा अवस्थित पाण्डेको घरमा कात्तिक १३ गते करिब १२ बजे अज्ञात व्यक्तिहरूले ढुङ्गा प्रहार गरेका थिए । यसबाट घरका झ्यालका सिसाहरू फुटेका छन् भने ८२ वर्षीया हजुरआमाले सुतेको कोठामा बढी क्षति पुगेको पाण्डेका अनुसार हो । सो घरमा पाण्डेकी आमा र हजुरआमा मात्र बस्दै आएका छन् । प्रहरीले घटनास्थलको प्रारम्भिक अनुसन्धान सुरु गरेको बताए पनि कुनै संदिग्धलाई पक्राउ गरेको जानकारी दिएको छैन ।
`
`घटनाको पृष्ठभूमिमा गत भदौ २४ गतेदेखि सामाजिक सञ्जालमा पाण्डेविरुद्ध उत्तेजनात्मक सामग्रीहरू पोस्ट गरी घरमा आक्रमण गर्न आह्वान गरिएको थियो । प्रेस चौतारी नेपालका महासचिव हीरामान लामाले जारी गरेको विज्ञप्तिमा यो आक्रमण षड्यन्त्रपूर्वक आयोजना गरिएको र पत्रकारिताका कलमजीवीहरूलाई दबाउने प्रयास भएको उल्लेख छ । “यो घटना अध्यक्षलाई डर देखाउने र प्रेस चौतारीका सदस्यहरूलाई त्रसित बनाउने प्रयास हो, जुन सफल नहुनेछ,” विज्ञप्तिमा भनिएको छ ।
`
`नेपाल पत्रकार महासंघले पनि घटनाको भत्र्सना गर्दै यसलाई पत्रकारविरुद्धको सुनियोजित आक्रमण मानेको छ । महासचिव रामप्रसाद दाहालको प्रेस विज्ञप्तिमा सत्यतथ्य छानबिन गरी दोषीलाई कानुनी दायरामा ल्याउन सम्बद्ध पक्षसँग जोडदार माग गरिएको छ । प्रेस चौतारीले पनि निष्पक्ष, छिटो र प्रभावकारी अनुसन्धान गरी अपराधमा संलग्नहरूलाई कारबाही गर्न सुरक्षा निकाय र प्रशासनसँग माग गरेको छ ।
`
`यो घटनाले नेपालमा पत्रकारहरूको सुरक्षामाथि प्रश्नचिन्ह खडा गरेको छ । महासंघ र प्रेस चौतारीका अनुसार, पाण्डे पत्रकारिता क्षेत्रमा सक्रिय र अभिव्यक्ति स्वतन्त्रताका पक्षधर व्यक्तित्व हुन्, जसले गर्दा उनीविरुद्धको उत्तेजना राजनीतिक वा वैचारिक द्वेषबाट प्रेरित हुन सक्ने आशंका गरिएको छ । स्थानीय प्रशासनले घटनाबारे थप अनुसन्धान जारी राखेको जनाएको छ, तर अहिलेसम्म कुनै स्पष्ट आरोप वा संदिग्ध व्यक्ति/समूहको नाम सार्वजनिक भएको छैन ।
`
`नेपालमा पत्रकारविरुद्धका यस्ता घटनाहरू बढ्दै गएको सन्दर्भमा दुवै संगठनले पत्रकारहरूको सुरक्षाका लागि तत्कालीन कदम चाल्न सरकारसँग आग्रह गरेका छन् । घटनापछि पत्रकार समुदायमा चिन्ता बढेको छ र यसले अभिव्यक्ति स्वतन्त्रताको मुद्दालाई थप जटिल र कमजोर बनाउने त्रास बढाएको छ ।
