काठमाण्डौंमा लागू औषध कारोबारी र प्रहरी भिडन्त । स्थिती नियन्त्रणमा

टोखामा नेपाल प्रहरी र लागूऔषध कारोबारीबीच भिडन्त, दुई कारोबारी र दुई प्रहरी घाइते

काठमाडौं, जेठ २७, २०८२
आज काठमाडौंको टोखा क्षेत्रमा नेपाल प्रहरीको लागूऔषध नियन्त्रण ब्युरो र लागूऔषध कारोबारीहरूबीच भिडन्त भएको छ। गोप्य सूचनाको आधारमा कारबाहीमा उत्रिएको प्रहरी टोलीमाथि कारोबारीहरूले रड तथा घरेलु हतियारले आक्रमण गरेपछि स्थिति तनावग्रस्त बनेको थियो।

प्रहरीले कारोबारीहरूलाई नियन्त्रणमा लिने प्रयास गर्दा उनीहरूले आक्रमण गरी भाग्ने प्रयास गरेका थिए। आत्मरक्षाका लागि प्रहरीले गरेको कारबाहीमा दुई जना कारोबारी घाइते भएका छन्। यस्तै, प्रहरीतर्फ पनि दुई जना घाइते भएको प्रहरी स्रोतले जनाएको छ।

लागूऔषध नियन्त्रण ब्युरोका प्रवक्ता जनक बहादुर शाहीका अनुसार घाइते दुवै कारोबारी भारतीय नागरिक रहेका छन्। घटनास्थलबाट करिब २०० ग्राम लागूऔषध बरामद गरिएको छ। घटनाको थप विवरण आउन बाँकी रहेको र अनुसन्धान जारी रहेको प्रवक्ता शाहीले बताए।

घाइतेहरूलाई उपचारका लागि अस्पतालमा भर्ना गरिएको छ। प्रहरीले घटनाको विस्तृत अनुसन्धान गरिरहेको र लागूऔषध कारोबारको जालो तोड्न कडा कदम चाल्ने प्रतिबद्धता व्यक्त गरेको छ।