७० लाख सुकुम्बासीको विद्रोहले दलाल सत्ता ढाल्नेछ: नहेन्द्र खड्काको गर्जन

‘संविधान र मानवअधिकार कुल्चिएर सुकुम्बासी बस्तीमा डोजर, अब वारपारको वर्ग-संघर्ष’

काठमाडौं, ११ चैत २०८२ — जनसंवाद ब्युरो

राजधानीको सिफल र टोखाका सुकुम्बासी बस्तीहरूमा दलाल पूँजीवादी सत्ताको निर्देशनमा चलाइएको डोजर आतंकप्रति अखिल नेपाल सुकुम्बासी संघले कडा आपत्ति प्रकट गर्दै निर्णायक संघर्षको बिगुल फुकेको छ। बुधबार संवाद डबलीमा आयोजित पत्रकार सम्मेलनमा वक्ताहरूले यसलाई ‘राज्य आतंक’ को संज्ञा दिँदै सर्वहारा वर्गमाथिको निकृष्ट हमला बताएका छन्।

नेपाली कम्युनिस्ट पार्टीका नेतासमेत रहेका खड्काले सुशीला कार्की नेतृत्वको चुनावी सरकारले संविधानको धज्जी उडाउँदै संक्रमणकालको फाइदा उठाएर निमुखा जनतामाथि बुल्डोजर चलाएको आरोप लगाए। उनले १३ लाखभन्दा बढी परिवारको प्रमाणीकरण प्रक्रिया चलिरहेकै बेला मध्यरातमा डोजर आतंक मच्चाउनु विधिको शासन नभई फासीवादी चरित्र भएको जिकिर गरे। खड्काले आफ्नो कार्यकालमा ५ हजारभन्दा बढीलाई लालपूर्जा वितरण गरेको स्मरण गर्दै अहिलेको सरकारले जनतालाई भूमिहीन बनाएर विदेशी शक्ति र दलालहरूलाई पोसिरहेको बताए।

संघका वरिष्ठ उपाध्यक्ष टिकाराम गुरुङ र उपाध्यक्ष लिला बहादुर मोक्तानले भर्खरै सम्पन्न निर्वाचनको म्याण्डेटलाई उपहास गर्दै जननिर्वाचित प्रतिनिधिहरूले शपथसमेत नखाएको अवस्थामा डोजर चलाउनु अमानवीय कृत्य भएको बताए। अर्का उपाध्यक्ष धनस्वर लिम्बुले सुकुम्बासीको वर्गीय हितका लागि देशभरका मजदुर, सुकुम्बासी र सुकुम्बासीप्रेमी शक्तिहरूलाई एकजुट हुन आह्वान गरे।

महासचिव प्रकाश खरेलले संगठनको तर्फबाट प्रेस विज्ञप्ति वाचन गर्दै अबको आन्दोलन केवल ज्ञापनपत्रमा सीमित नभई निर्णायक ‘वर्ग-संघर्ष’ मा बदलिने चेतावनी दिए। सुकुम्बासी अभियन्ता सिवि लामाले बस्ती रक्षाका लागि आत्मरक्षाको अधिकार प्रयोग गरिने स्पष्ट पारे।

उल्लेखनीय छ कि, गत फागुन २८ गते सिफल र चैत ९ गते टोखाको दाहालगौँडामा राज्यले आफ्नो दमनकारी शक्ति प्रयोग गरी सयौँको वासस्थान भत्काएको थियो। अखिल नेपाल सुकुम्बासी संघले यी घटनाहरूको बदला लिन र सुकुम्बासीको अधिकार सुनिश्चित गर्न देशभर सशक्त संघर्षका कार्यक्रमहरू सार्वजनिक गर्ने तयारी गरेको छ।